الايد الشمال

حاجات كتير كنت ناوى احكيها عن ماثيو ال كان بينام على الكنبه الحمرا لاسبوع ومشي

بس الواد ميت

الاول كنت فاكره خجول لان سنه 16 سنه

بس مع الوقت

الحاجات ال مكنتش عايز احكيها عنه

وال كانت حلوة اوى بس حسستنى بس بالافتقاد مش لانه مشي

لأ

لانها حاجات حلوة وخلاص

حلوة ف نفسها بعيد عن انها كانت معاه

اكل كشري كبير من عند (الطيب) ورا سينما ريالتو وبعدها رز باللبن من عند الراجل ال جنب محمد احمد بتاع الفول ،وبعدها ايام من اكل الفول او وقفته عشان اشرحله وهو بياكل ايه هو بلح الشام ،وتفليستى بقى لانه مش متربي على ثقافه (لا والنبي خلى والله م انت دافع)

وحتى لما اخدته لصحابي وكان مكسوف من آيه ورشاد وعبير ويولندا وسبنا وراح لعب مع ولاد من سنه كوتشينه ف الكافيه ورجع خسران

لأ

مكنتش الحاجات حلوة حتى واحنامكررين نتغدا فطيرتين بالكستر والسكر من عند ابو فارس او يقعد بعدها ف قهوه التجاريه

مش عارف جايز انا ال مكنتش مبسوط او الواد منير لما كلمنى عن الممل عدانى

مش عارف

بس الواد حتى وهو بيخلينى احس مشاعر اب ده لانه صغير للدرجه ال بيمسك فيها ايديا وانابعديه ،او بينام اول مابندخل البيت ع الكنبه الحمرا بهدومه، مكنتش مشاعر حلوة كانت فاتره

وحتى وهو بيصحينى الجمعه ال فاتت عشان عايز يحضر صلاة الجمعه ( رغم انه كريستيان)عايز يحضر من اول الصلاه وف جامع حسب كلامه دافى ،ولم اخدته وروحنا جامع شعرواى فى لوران والامام سمح لى انه يصور الناس والجامع وكنت بقالى قرن من الزمن مصلتش ،وحتى وانا بسمع حديث حلو اوى قاله سيدنا محمد (بس للاسف الحديث مش مشهور زى من راى منكم منكر او اماقة الطريق)حديث بيقول (التمس لاخيك مائة عذر فان لم تجد عذر فلا تلمن الا نفسك)

حتى وانابسمع حديث رائع بالشكل ده، اخترقنى للدرجه ال قلت ابقى اروح انضف الجامع كل يوم تكفير عن ذنوبى

حتى ده مكنش احساس جوانى كده من ال بيقومك فتروح حالا تعمل كده

لا احاسيس لحظيه متطايره

كان شغلنى مش ماثبو

فكرة انه هيجى ويمشي

ومش عارف ايه الفكره دى ، بس مكنتش بسطانى

طيب طول الايام ال فاتت كنا بنمشي انا وماثيو على البحر لوقت متاخر وكانت الناس سهران ف ميامى ع الشط بتنزل الميه بعد واحده بالليل

كان فيه واحد شاكله صنايعى وغلبان باين من نومه على حجر مراته على الرمل وفراشين تحتهم ملايا وجنبهم حله صغيره وطبقين

او ولد شكله حلو ورايق وبيلعب مع كلب صغير بتاعه بانه بيسيبه وينزل الميه والكلب بيقرب منه وبيلمس الموج وبيخاف يقرب، وكله نداءات توسليه انه بلاش يلعب اللعبه دى لانه خايف ينزل وراه الميه

وقتها كنا بنتكلم انا وماثيو عن وجود امريكا ف العراق واعدام صدام ليله العيد كاضحيه، وانامفهتمش ومميزتش من كلامه كتير غير انه قال(اه الحرب ضروريه وكان لابد منها والموضوع اه زى مابتقول داخل فيه بيزنس البترول..ومفيش حرب حلوة )

قبل مايمشي بيومين كنت سرحان وبفكر ف فيلم اكتبه يكون تجارى( بعد كام الفيلم القصير ال كتبتهم) وعمال افكر يبقى ازاه تجارى وشبهى ، كنت ممد على الكنبه سرحان ف صور الممثلين الاحلى ف عنينا وال معلقهم على الحيط ورا الكنبه الحمرا عشان يدارو الرطوبه ال بيتخلى الحيطه تقشر وتعفن

كانت الرطوبه ( بقصد من الله) كانت عدت الصور وطبعت نفسها على اجزاء منها، فظهرت بس ايد سعاد حسنى ف الصوره الابيض واسود انها مرطبه ومتاكله ورقبة اوما ثورمان وهى متاكله ف صورتها لحد سدرها، وايد جوليان مور وهى حطاهم بين رجلها ف الصورة كانت متاكلين ،بالظبط على اد الايدين ،وشون بين ومونيكا بيلوتشي ودى تورو ومارلين مونرونيكول كيدمان

سألنى وهو بيفتح اميله ع الكمبيوتر

عندك مانع امسك الموس بايدى الشمال

قلت له انا اسف بس انا الانجليزى بتاعى مش جامد ممكن تعيد تانى

(عندك مانع امسك بايدى انا ال شمال انى امسك بيها الماوس ده ؟)

لا خالص الا اذا كانت ايدك مش نضيفة يا ماثيو

قال لى

لا انابس بسالك لان عندكم فى الاسلام الايد الشمال

حرام

ايه يا ماثيو مش سامعك

قالى تانى

الايد الشمال عندكم انتم فى الاسلام حرام

مش كده