Sunday, February 4, 2007

البلكونه

الاله فى البلكونه
وانت محبوس جوه اوضتك
نظرته الصافيه الحنونه
بتقولك يلا شد فوضتك
وابدأ اليوم اللذيذ

الله يا فكرة مروقه
شمس وهوا وشقشقه

عيش حياة اهل الصحابه
بيقولو فيه آيه جديده
آيه فى القران جديده
مش فاكر ايه نصها
بس بتقول

بسم الله الرحمن الجميل
لو هترسم الاله
هيمد ايده فى السما ويجيبلك ازرق
حاجه واحده كفر بيّن
لو تشغبط
انما انا الرحيم , هاعتبر ان الشغبطه
سرياليه

9 comments:

عسل مرمر said...

مــســيــلــمــه الــكــذاب

عسل مرمر said...

انت مش زى مسيلمه الكذاب ولا حاجه ..

كلامك باين فيه ايمان و حب لربنا مش موجودين عند كتير مننا

مع انك ما يبانش عليك خالص

بس سؤال .. هوه ينفع حد يكتب عن ربنا و عن الدين بالروقان و اللذاذه و الجمال ده؟

Anonymous said...

**(((((تسجيل حضور)))))**

تقريبا المترجم بتاعى محتاج حد يترجمله
......
فى انتظار فك الشفره ):

Anonymous said...

خسارة انك ما بتحاضرش..

_________________

يصلب الانبياء من أجل رأى
فلماذا لا يصلب الشعراء؟؟

ده نزار قبانى الى بيقول على فكرة :))

بس قال كمان
الفدائى وحده...يكتب الشعر
وكل الذى كتبناه .... هراء

Bahz.Baih said...

انا هرد هنا علشان أسجل التواجد الذكورى فى هذه المدونه على حسب طلبك رغم أن انا مش فاهم الطلب ده

انت ليه مكسوف من تعليقات البنات و أن كل اللى بيقرالك بنات.. و الله يابنى دى حاجه حلوه

اما القصيده فانا علقتلك عليها لما قريتها اول مره

بلال حســــنى said...

دودو
انا مكنتش حابب افسر القصيده لانى لو عملت كده يبقى ليه مكتبتهاش من الاول كرأى مش قصيده
وبصراحه مش فاهم قصدك ايه بمساله التصليب للراى او الفدائى , بس على اساس ال فهمته من كلامك ممكن اقولك انا مش بناضل من اجل كتابة حاجه انا بس باكتبه
بس
وبجد اختلافك عليها اختلاف بالنسبالى متوقع لانه بيمس مقدسات او طريقه ما للكلام عن ربنا
بس خلينى اقولك حاجه
انا مره كنت غضبان جدا لفكرة ان ماما قعدت سنين طويله من عمرها تتعذب من مرضها وف لحظة يأس اوى من حالتها كتبت قصيده عن ربنا عن الالم عن طريقته ف التعامل معانا وكانت بجد حاده, اكتر من حاده بشكل كنت بخاف ارددها وانا جاى انام كل يوم ( لانى كنت متعود لفترة انى اكلم نفسي بكلامى كل يوم قبل ماانام)
بس كتبتها وووريتها لكل حد اعرفه
لانها ببساطه بتمثل لحظه حستها , وسداينى كل حد بيبقى عايز يمسك اللحظه دى ال مش بتتكرر تانى,لحظة انفعال او حب او توهان ويثبتها
الشعر بيعمل كده
اناكمان فى الحال العكسيه مش طول اليوم بتكلم عن رواقة ربي او وقوفه ف البلكونه,ده خروج
بس دى طبعا فكرتى عن ربنا او اى حاجه تخصنى

عسل مرمر said...

بيبو انت حلو أوى
قصدى كلامك
لأ بس انت أحلى
من الكراميل
اللى على الكيكه

Ahmed said...

Ohbedo عزيزي
كلامك حلو جدا
بغض النظر حلال حرام مش مهم
المهم عجبني خيالك و أسلوبك
أتمنى لك التوفيق

Anonymous said...

قصدى من البيت الاول اقرار بحقيقة واقعة اصلا -مش بطلب ان ده يحصل -(يعنى خد بالك)
.......سؤال نزار استنكارى........
والبيت التانى بحسدك على قدرتك و جرأتك فى التعبير عن الى جواك حتى لو كان متعلق بربنا
اقتباس (((بخاف ارددها وانا جاى انام كل يوم )))....

سورى لو كان المعنى الى وصلك انى مختلفة معاك وبطلبلك حاجة وحشة