Sunday, July 1, 2007

الكلب الاجرب الحزين





















احنا كتير بس
بس مش حلوين
مجرد زحمه
او على حد تعبيرى فى اغنيه جديده
متر الوطن بكام
حبة تراب فوقهم زحام

بجد احنا مش حلوين وجايز مش احنا السبب
غالبا احنا متربناش كويس على اننا يكون عندنا ذوق فى اللبس
ونضايق اوى من ده فبالتالى مبقيناش حريصين
بقينا متعودين نمشي جنب اكوام الزباله
وبالتالى اختيارتنا نيله وبعدين نرجع نقول ليه السينما
او الغنا زى الزفت ده لاننا ببساطه ده بيبقى ذوقنا العام
وده ال بننزل ندفع فيه فلوس باغلبيه
احنا نقرف الكلب الحزين
حتى واحنا عندنا فكرة حلوة زى المدونات
عشان ننقل منها ميديا مختلفه لمبدعين فى الغنا
مثلا فحد يعمل مدونه يسجل فيها اغانيه المختلفه
ويسمعهلنا بوسيط سهل او حد بيعرف يحلل مجتمع
وحريص انه يغير او حد بيعمل سينما او مزيكا
لالا
هتلاقى اغلبنا يا اما بنت وحيده لاقت
ان بديل عن الشات الليلى مع صحابها انها تعمل مدونه
تتكلم فيها عن تفاصيلها ال بتخليها حيه
وبتلاقى الوقت ال تكتب فيه بالكثافه دى
احسن من انهاتعمل حاجه تخليها افضل
او تشتغل حاجه هى ممكن تلاقى نفسها فيها
وبيبقى مننا المناضلين الوطنيين ال بينادو
بتعدديه حزبيه من باب الكلام معلهوش حرج
وهو جاهل بطبيعته وبيبان ف نداءته الحاره
ويا سيدى بقى على المدونات ال هى اباحيه
بطبعها كنوع من التفريغ زى بنت لطيفه
بتكتب بس ف السكس وبتعرض صور بورنو طول الوقت
من باب ان العرى شيء رائع (لسه مدموزيل لطيفه
بتدعو بحراره اننا متخلفين عشان مش بنمارس الحب ف الشارع)
مرورا بمدونات اجمل واجمل عن عانس او عاطل ليلي
وبيحط صوره معبره ويلاقى كل البنى ادمين ال بالضروره
بيعلقوا عنده او عندها كنوغ من تقديم السبت فيروح
هو او هى برد الواجب والتعليق عنده
حاطط مجرد صوره او كلمتين عن انه صحا الصبح بيهرش
فى مؤخرته بعصبيه وان ده اثر على قاعدته طول اليوم
ياحرام
انامش ضد اننا كمصريين طفسين ولما بنلاقى حاجه حلوة
بناخدها نشوهها شويه لدرجه انك تلاقى الحديث الداير
هو انت ليه معملتش مدونه لحد دلوقت ياراجل اعمل مدونه
او اعملى مدونه تتسلى
لالا , اميرة جايه بتصوت بتقولى زياد رحبانى
عنده مدونه محدش اصلا بيعلق فيها
زائدالناس ال بجد ال انت عايز تلاقيهم على مدونات
بيكتبوا مش لانهم مضطرين يكتبوا طفاسه
مش موجودين
احنا بجد نقرف الكلب الحزين وبيجامتنا مقطعه
وبيبقى شكلنا منعكش وحنا داخلين ننام
انما لازم الصبح نكون حلوين عشان الناس تشوفنا حلوين
والمدونات ببلاش اعمل واحده عسلى وواحده مخططه

انابدون افتعال
مش ببص لنفسي الصبح فى المرايا وكمان
مش بحب ابص للناس ف الشارع
شكلنا وحش ومعدناش ذوق وعنينا جريئه ف البص ف بعض

انا افتكرت انى اول ماهلاقى مكان زى المدونه
انى انشر فيها شعرى او كتابات ذاتيه او سينما
هقدر اقنع المهتمين او المشتغلين على نفس الموضوع
اننا نتواصل من خلال المدونات والاثى ناس تانيه
عاديين جد ا بس بيجادلوا وبنحتك ف بعض كده عبر وسيط تانى

حاجه تقرف انت بتكلم نفسك ومحدش مستنى منك حاجه
وزى ماقلتلك اقوم اعمل مدونه عسلى وواحد مخططه حلوة او حمرا زى....


زى اى حاجه حمرا

ممكن تفهمها على انها الكنبه

8 comments:

صاحب البوابــة said...

حاجه تقرف انت بتكلم نفسك ومحدش مستنى منك حاجه
وزى ماقلتلك اقوم اعمل مدونه عسلى وواحد مخططه حلوة او حمرا زى....


---------------

ومن قال هذا

؟؟؟؟

اننا جميعاً ننتظر الافضل لنتحاور معه

فكن انت الافضل دائما

تحياتي

Searcher said...

هو إحنا ليه بطبعنا مزودنها أوى كده و مش بنشوف غير النص الفاضى من الكوبايه التجربه لسه فى أولها و فى ناس كتير إستسلمت بسرعه بس فيه ناس أكتر لسه موجوده و أدينا كلنا بنحاول يمكن يطلع مننا حاجه كويسه على فكره إنت أول ما إبتديت تكتب كنت مصنفك تحت مدونات البورنو بس الوضع إختلف دلوقتى
إحنا مش كلنا دارسيين شعر أو موسيقى أو مسرح بس بنحاول نفهم و بييجى علينا وقت بنبقى عايزين نبنى و وقت تانى بيبقى مفيش قدامنا غير إننا نقلب الترابيزه و نقوم و ده طبيعى بس يمكن مع الوقت يتغير
بالتوفيق و تحياتى

moneer said...

يا عم بلال ابسط حاجه ان من غير المدونات مكنتش هعرف ان فيه ناس جميلة زيك موجودين فى البلد و قيس على كده مدونين كتيير
و ده كفاية عندى

بلال حســــنى said...

صاحب البوابه
احيك على انك ممكن تنتظر الافضل
بس ده ميمنعش وجود الاسوأ طول الوقت

بلال حســــنى said...

searcher
لا مش فكرة النص الفاضي من الكوبايه
فكره هى ليه الكوبايه مش مغسوله كويس
تابع التعليقات ال بعد ال بعد ال بعديك
عشان تفهمنى
ثانيا حرام عليك ياراجل انك تصنفنى فى البدايات انى مدونه بورنو
انامعنديش بوستات كده
اناكنت واضح من البدايه وقلت انها يوميات واحد على الكنبه الحمرا وفى بوستات اكثر جراءه زى بريستتيوت انامتعدتش حدود اللياقه
ومستخدمتش مرة لفظ خارج او احياءات جنسيه
بس كتبت قصائد ليها علاقه بالجسد او بوستات ليها علاقه بالجنس كيوميات ومكنتش كتير لدرجه التصنيف
ثانيا انامقلتش انى عايز بس مدونات فنيه انااتكلمت على ان لو حد بيعمل حاجه ميعملهاش بطفاسه لاننا كده فعلا كشعب

بلال حســــنى said...

منير
اشكرك جدا
وانت عارف انى من زوار مدونتك وبحبها جدا

عـسـل مـرمـر said...

حـمـرااااااااااااااااااااااا

Searcher said...

يا صديقى أنا ماكنش قصدى حاجه وحشه بتصنيفك ضمن مدونات البورنو و بعدين أنا قلت فى الأول و كنت متوقع إن معظم تدويناتك تكون بالشكل ده بس لما تابعتك إكتشفت إنى كنت غلطان و إن الإنطباعات الأولى لا تدوم
;)
و بعدين هو حد يطول مدونته تبقى بورنو ده حتى دول عندهم أكبر نسبة متابعة
:)
و طبعاً واضح من كم التعليقات اللى إنت مسحتها إن إنت معاك حق

أرجو إنى أكون وضحت وجهة نظرى
تحياتى