Tuesday, July 3, 2007

الايام الاكثر اثاره فى حياة امريكى على الكنبه الحمرا

يغيب انطونيو الواد الاسبانى ال ساكن معايا اناوبهظ، يغيب لمدة شهر خلص نصه الى اسبانيا والمغرب وبنستقبل بكرة انا وبهظوظ شريكى ضيف لمده اسبوع واحد من الولايات المتحده من حاجه كده تقريبا ليها علاقه بالتبادل الثقافي بين الشعوب
الواد الامريكانى جى ياخد قرص عربي وحصل له مشكله فى العيله ال كانت هتستضيفه
بيتنا(الكنبه الحمرا) و(المرتبه الاورنج لصاحبها بهظ) هتكون سند للواد لمدة اسبوع لحد متظبط المنظمه المعنيه بالتبادل الثقافي بيت عيله للواد الامريكانى

من بكرة بالليل هيعش ضيفنا تجربه مثيره
واحنا طبعا بنهضم مش حضارات لا
كواكب سياره
انطونيو مثلا قدر يدمن انه يعمل النسكافيه النهارى فى الطاسه واحيانا لو فيه ضيوف من الحله ال سبهلنا محمد البدرى من مقتنيات والدته ال استضفناه من دوله حلوان الشقيقه
الاكتر من كده بيواجه الواد الامريكى _الذي اجهل اسمه _ كميه من الشربات رهيبه وغير مغسوله والمغسول منها مش مغسول حلو فبتتبقى منه ريحه محببه للنفس البشريه
طبعا مرورا بديكور مختلف عن بيئه استوائيه عاشها الصبي الامريكى
حيث وبطريقه عفويه وحين فشلنا فى تصليح التليفزيون قلبناه ترابيزه حلوة جنب الفوتيه الاحمر
واحنامضطرين بشكل دائم ان نقوم بوضع باسكت الزباله الازرق الكبير تحت البوتجاز الكهربا كنوع من الترابيزه وده فى مدخل البيت اول ماتدخل
ومعتقدش انه هيحب يسهر معانا فى اوضتى انا والسيد بهظ لانها مفهاش نور وبندخلها حسب التخيل
وميتهياليش انه هيحس بقصديه اننا مختارين ان تكون الطله من البلكونه على حيط عماره وان البلكونه اصلا اصلا بتطل على المنور
الساده والسيدات
اليكم اهم 7 ايام اواكثر قليلا
الايام الاكثر اثاره فى حياة طالب امريكى فى ميامى الاسكندريه
اليكم الحدث

________________
اه احنا باعتبارنا معفنيين بالفطره مش بنرمي ازايز البيبسي خالص يجي كده من ديسمبر الماضي وطبعا انا مفهم انطونيو اننا بنحتفظ بيها عشان هنقف ادام العماره نبيعها بلاستيك لما نفتقر جدا

اعتقد ان الوافد الامريكى هيظن كل الظن اننا بنحب البيبسي وبنحتفظ بالازايز الفاضيه كتذكار
وبالتالى مش هيحس بغربه
وهيحس انه فى موطنه الاصلى

19 comments:

محمد بدرى said...

الكنبة بقت إنترناشونال
والفضائح بقت دولى ، وربنا يستر على الواد اللى جاى وما يقابلش الرشيقة المتطورة
مراسلكم محمد بدرى من دولة حلوان العربية الشقيقة وقريبا بالأسكندرية وبعدها الله أعلم

حــكــيــم روحــانــى said...

يا عينى يا حرام .. انت اتعديت من أصحاب المدونات المخططه اللى كنت بتنقدهم ف البوست اللى فات...

دودو said...

سؤال بس معلش
بالنسبة للحلة يعنى ايجار ولا تمليك؟
معلش انت عارف الظروف بقت صعبة الايامدى

:))

elharam said...

والله يا أستاز كنبة أسلوبك فى الكتابة زريف وغريب بس ياريت لو مافيهاش رزالة تكبر الفونت وتخلى الباج جراوند أفتح عشان عندى إستيجماتيزم,يالنسبة للموضوع إاللى قبله موضوع الكلب الحزين إنت عندك حق,إحنا شعب الموضة فى أى حاجة,تلاقى واحدة كاتبة مدونة والكلام مش مفهوم تقوللها والله يعييى كلامك حلو بس مش فاهم أى حاجة,تحش إنها لبست نضارة المثقفين وقالتلك مش لازم تفهم,أهم حاجة إن المشاعر والأحاسيس تعبر عن نفسها والكلام الأهبل دا وهى غالباً حتلاقيها مصاحبة واد بعربية 128 متفيمة وواحدة تانية تتطلع ليزبيان,هو إيه إللى جرا فى البلد؟

moneer said...

اعتقد انها هتبقى الايام الاكثر اثاره فى صيف ممل فى حياة شاب اسكندرانى مش لاقى حاجه يعملها
اللى هوه انا
مستنى منك التفاصيل
سلام

الكنبة الحمرا said...

بدرى
ال انت خايف منه
وشيك انه يحصل (وشيك بمعنى مؤكد)
منور الكنبه فى ظل التتطورات التكنولوجيه من حيث الفضائح الدوليه

الكنبة الحمرا said...

حكيم روحانى
انابسجل تاريخ مصر من واقع بيت بيطل على المنور
وده انجاز التاريخ هيكافئنى عليه وهتتباع الكنبه الحمرا فى مزاد دولى سنه 2120
ومصر هتطالب برجوع الكنبه من مارسيليا من متحف بانكو للمقتنيات الشخصيه
وكنبتى مش منقطه ولامخططه ولامقلمه

سودا

حــكــيــم روحــانــى said...

منا قلتلك
حــمـــرا

الكنبة الحمرا said...

دودو
انااسف انى انقلك الاحبار السيئه دى
اناواخد الكنبه وضع يد وبكلمك وانا ايديا كلها ميه من غسيلها
اناعارف انى جوازكم انت وزين عائله البدرى واقف على الحله
بس لا

بس اناعايز تقدرى الموقف التاريخى
انتى غالبا هيكون استخدامك ليها لعمل ملوخيه او بسله بالحزر
انما انا باستخدمها فى حاجات اسمى ومتعدده
عمل الشاى
ضرب النسكافيه قبل عاميله
سلق الفراخ الصغيره المجنسه
واعتقد فى المستقبل هلبسها فى راسي وامشي زى المجانين فى الشارع مرتديا احدى شربات البهظ المتعدده

الكنبة الحمرا said...

استاذ هرم
البلد بايظه من زمان
هحاول اغير البوج عشان خاطرك
بس اصل ال مختار مختارلى اللون والفونت عزيز عليا
وهيبقى صعب اغيره جدا
منور الكنبه

الكنبة الحمرا said...

منير
اسوأ حاجه ممكن تحصلى اقصد تحصلك
الممل
خحاول تستناه عند باب العامره وتقوم مشنكله على بوزه
وسدأنى حتى الممل دولى الواد الامريكى ملان

حــكــيــم روحــانــى said...

على فكره انا متأكد ان اللى مختار لك الوان البلوج و الفونت مش حيزعل لو غيرتهم ..
بس الغريبه انك غيرت رأيك بسرعه كده .. مع ان الوان البلوج كانت عجباك بشكل هستيرى مستفز


بلال يتحدى الملل

حــكــيــم روحــانــى said...

بقول ايه يا كابتن
هوه انت ليك إهتمامات سياسيه ؟

Searcher said...

واضح إن فيه بيننا حاجات مشتركة كتيير أنا برضه عندى كوم شرابات فى أوضتى و فقدت الأمل فى إنى أغسلهم و عندى حوالى 100
إزازه بلاستيك بس بتاعة ميه مش بيبسى إنت عارف هنا مية الحنفية مبتتشربش غير إن أننا مبحبش البيبسى و معنديش فى البيت غير حله واحده بأستخدمها لكل الأغراض بس على فكره جايب كنكه لزوم الشاى و النسكافيه
ربنا يتوب علينا بقه
تحياتى

الكنبة الحمرا said...

حكيم روحانى
الحاجات كلها داخله ف بعضها والسياسه ليها علاقه بالكنبه
علاقه خفيه

الكنبة الحمرا said...

searcher
انابفكر نعمل جماعه نلم فيهابعضنا كلنا مع بعض
ونحتار لينا اسم للمجموعه
ونحط كل اللينكات لينا
عشان لما المجتمع يحب يتغير يقوم شايلنا هيلا بيلا ورمينا ف الميه

منور الكنبه
واكيد انت مش حاسس بغربه

Searcher said...

بس تفتكر الميه ليها ذنب عشان يعملوا فيها كده
:)
هو بالنسبة للغربة أكيد مش بحس بيها على الكنبة بس فى السعودية
أوووووووووووووووووف
نفسى أرجع إسكندرية أعمل شوية حاجات كدة من اللى مش عارف أعملها هنا و بعدين أرجع تانى
الكنبة منورة بأصحابها
;)

الكنبة الحمرا said...

searcher
انامفكرتش ف موضوع الضرر ال هيحصل للميه
بس انت عارف من الميه وللميه نعود زى السمك


الله حلوة دى تنفع لوجو للكنبه باعتبارنا اسكندرانية بحر

متشكر للالهام

aziz said...

بسم الله نفتح المزاد
انا تاجر عقار من جدة
وأنا جاد
وكلامي صحيح
انا بدفع في الكنبةالحمراء 5000جنيه مصري
واذا وافق صاحبها بكره يكون الدفع والمشترى عن طريق وكيل اعمال بالقاهرة يمر يدفع ويستلم
بانتظار الرد بالقبول اذا ما احد زاد على المبلغ
والسلام