Thursday, March 15, 2007

فراشه بلاستيك

فراشه معموله بلاستيك ومش بتطير

بتقول انك لما تكون بتطير ف السما
وبتروح لبعيد
دى حاجه بتخنق

ويا سلام بقى لو ليك جناحات
وبالتحديد
الشمس بتشرق
دى حاجه بتخنق

فراشه معموله بلاستيك ومش بتطير

عمرها ما اتمنت لفراشه من جنسها
تكون حيه
زى الحيات
فراشات حيات
اصلك لما يكون لك عمر وروح وهوا
بتموت بالذات
ودى حاجه بتخنق

فراشه معموله بلاستيك ومش بتطير

خد واحده وواحده عليها
والسعر خطير

دى
فراشه معموله بلاستيك ومش بتطير
تنفع تتساب على مكتب
او طرف اطار برواز
او
تتعلق على مركب
شراعاته حرير

فراشه معموله بلاستيك
ومش بتطير

2 comments:

vetrinary said...

جامده يا معلم
انا فاكر انى علقت عليها امبارح
ولا انتا بتمسح تعليقات الرجاله
عل العموم انا ابتديت اشك فيك

بلال حســــنى said...

vetrinary
اشكرك انها جامده
بس انا مش بمسح تعليقات الرجاله
وصدفه بحته جدا ان ال بيعلق عندى بنات
لا داعى للشك
وايه علقت عندى ونسيت
انت بتشترى حشيشك منين؟
سدأينى اى مكان غير بحرى وراس التين لو كنت اسكندرانى بيطلع مضروب
ومخلوط


منورالكنبه يا معلم