Friday, May 18, 2007

دخول الاسلام


انطونيو اعلن النهارده اسلامه
كده وش
عمل احتفال بعد صلاة الجمعه فى مسجد صغنن فى المنطقه بين سيدى بشر والسرايا
بالشكل ده انا بعلن دخول الاسلام بيتنا وبشكل اندلسي
اصلا قصة دخول انطونيو الاسلام مبتدتش النهارده بس صعب الدخول فى تفاصيل شخصيه

اعتقد ان شرارة اول لحظه ايمانيه كانت من شباك المنور

الست ال ساكنه تحتنا بتسيب القران مفتوح طول الوقت عشان الشقه تتحفظ جايز من الشياطين او الحراميه

بس كنت برجع بالليل ولاقى انطونيو لافف ال

قصدى لافف البطانيه وسرحان فى صوت النقشبندى


احتفال النهارده كان كوميدى جدا

اناوصيت اميرة انها تبقى لابسه لبس يليق بالموضوع الا تيجى بحاجه ضيقه او مزهزه وانتو عارفين ان ده ضد تعاليم الاسلام

اميرة جت لابسه ابيض وفسرت ده انه لون ملائكى

اميرة كمان جت معاها شنطه جابتها من خان الخليلي الاسبوع ال فات

وببراءه قالت لى ايه انا اتاخرت فاتنى حاجه وبعدين انا لابسه زى ماقلتى زى اسلامى

رشاد بيتوقع ان اسلام انطونيو بكرة ينزل على البلوتوث بين الشباب

كمية كاميرات كانت بتصور

غير ان مارك لطفى بعت اسلام كمال يصور بكاميرا ديجتال

الكلام على فيلم عن اسلام انطونيو

الميديا بتلعب دورها

الموضوع عدى بسرعه وحسيت انى محتاج ابكى كأن بنتى هتتجوز وهتسبنى

كنت واقف جنب اميرة لما حسيت ان انطونيو خلاص

كبر

بهظ مقدرش يجي وانطونيو زعل جدا وناس كتير سخنت الجو وقالت انه كان نايم وال قال انه مش مهتم

بس هما ميعرفوش حاجه

انا بس ال اعرف

بهظ كان تعبان دخلت عليه قبل صلاة الجمعه قلت اخده معايا واخد دوش بالمرة بمناسبة اسلام انطونيو

كان صوت قران الجمعه حفيف وبعيد كأنه جاى من بلد تانيه وريحة شربات مغسوله بس لسه ريحة مقرفه محببه حلوة فيها

ملت عليه وكان الضوء جاى من الصاله

بهظ

بهظ اصحى يا بهظوظ الواد انطونيو هيسلم اصحى يا ابنى

خطرف شويه وقالى يوووووووه بقى . هو فيه حد يسلم الصبح كده ما كان احتفل العصر ولا المغرب خلاص لازم بعد صلاة الجمعه

لاخر لحظة بهظ كان عايز يجى ويلبس انطونيو معايا زيه لكنه كان مشغول بحاجات اهم

فيه ناس شفته وهو بيساعد اليتامى وبيعطف على الارامل فى مكان نايء وهادى وفقير

وناس تانيه فى نفس اللحظه شافوه لابس اخضر ف اخضر وبيوزع تمر وبلح وياميش على الاطفال


وبيفضل بهظوظ دايما لغز محير للاطفال والكبار

انطونيو راح كمل احتفاله بالاسلام مع صحابه الجدد فى الكينج المريوط حيث الجو هناك احر واشبه بصحراء الجزيرة العربيه قبل اسرة ال سعود

انطونيو مبقاش انطونيو

واحده ست وانا بهنى انطونيوو بحضنه واعيط كنت باقوله ويلكم تو اسلام انطونيو

كونجرتليشن يا مان

قالت متقلهوش يا انطونيو

بصيتلها

كانت ست عجوزه شاحبه غائبه عن الحياه مرتديه زى اسود ارملى

قالت لى متقلهوش يا انطونيو
اسمه يحيي

5 comments:

Anonymous said...
This comment has been removed by a blog administrator.
محمد بدرى said...

كان نفسى ابقى موجود، حصل خير
الله أكبر
والنصر للسيارات

Bahz Baih said...

بصى يا ست شيماء
أكطونيو بكل بساطه واحد صاحبنا اسباني و عايش معايا انا (بهظ اللى كان نايم) و بلال... بقاله تلات شهور فى مصر... المهم عجبه الاسلام و حب واحده و قرر يسلم

بس خلاص,,, هتحاولى تسألي أزاي مثلا اقنعناه بالاسلام.. و اله معرفش دي جت ازاى .. اصل انا و بلال بنصلي فى العيد لو صحينا اصلا يعنى بالعافيه تقدري تسمينا مسلمين

بس الفكره هى ان اننا ماحاولناش نقنعه بقد ايه الاسلام حلو قد ما حاولنا نفهمه ايه هى كل الخلفيات الفلسفيه حوالين الاسلام و ازاي اننا في مخصر حاليا منعرفش من تعاليم الاسلام الا اسمه و حطيناه فى جوهر المشكله و قلناله دور معانا جايز نلاقى حل سوا

طبعا البنيه الى حبها كان ليها دور و الناس فى مصر برضه ... اصل بجد المصريين طيبين

المهم الهدف من الكومنت ان اسيح لبيبو شويه و اقولوكو ان اول ما يحيى قرر انه يبتدى يصلى قبل الاشهار بأسبوعين قال لبيبو ماتيجي نصلى

الكلب قاله مش قادر

يحيى قاله بس كده حرام

قام بيبو قال : تصدق انا كنت بحبك تكتر و انت من غير اله!!!؟

ليه كده يا بيبو

Anonymous said...
This comment has been removed by a blog administrator.
دودو said...

الف الف مبرووووووووووك