حركة صوابع ف كف

وانا صغير جدا صاحب العمارة ف بيتنا القديم كان مقرر مع نفسه اننا لازم نسيب البيت لان بابا علميا توفى، ماما رفضت_ مش ان بابا يتوفى_ لأ ان صاحب العماره يطردنا من البيت ، تانى يوم ولوحده راح كاتب بخط كان بيتهيالى_ ومش ازاه كنت واصل لده_ انها(فورما) بتتحط فى مكبس عشان يطبعها كتير على كل بيت
كانت مطبوعه من ناحية الشباك ،احنا كان بيتنا فى الدور الارضى،
كان كاتب ان الشقه ال احنا فيها( بيتنا) معروضه للبيع وان المخابرة مع صاحب العماره الحاج الصعيدى،هو مقدرش يبعها خلال 27 سنه فاتت، بس الجمله المطبوعه على الحيطه فضلت مطبوعه فى مكانها لحوالى 10 سنين هى الفتره قبل جواز ماما التانى، المرة الاولى ال شفت فيها اليافطه المطبوعه عند الشباك وان بيتنا معروض للبيع مخوفتنيش ،انا بس توهت فى طريقة مااذا كانت حد كتبها ولا هى( فورما) جوه مكبس بتتطبع على كل البيوت،
صاحب العماره كان عنده محل بيبع فيه من اللبن لحد الرنجه
مرة كنت متضايق اوى من فكرة الطرد، خصوصا لما مراته قالت وهى محتده اوى وانا بشترى( لوليتا)
(لوليتا هو مكون مثلج معمول من لون صناعى ونكهه للفراوله او المانجه ومحطوط فى كيس صغير مستطيل وبتتعامل معاه انك تمصه كأنه عصير بلون صناعى مثلج)
مرات صاحب البيت الحاج الصعيدى قالت لى قول لمامتك هى ايه مش هتسيب الشقه ولا ايه فيه حد جاى ياخدها، وسبتنى ودخلت المحل،
كانت فارشه بره ادام المحل
ال نط فى بالى وقتها انى اسرقها انتقاما من فكرة طردنا،
وقفت كتير ادام البسكوت المفروش برة ادام المحل ،وكان لازم اقرر ان الفكرة مش حرام تباعا للمسلسل المعروض حاليا على الزيبق،
الوقت كان ربع دقيقه بس من الدقيقه ال صحتها حلوة وبتعدى حوالى 12 دقيقه وشويه ، قررت اخيرا وانا عينى متسمرة عليها انى امشي، التفت بسرعه وسحبت بسكوت شمعدان كبير ابو ربع جنيه ومشيت من غير ما ابص ورايا

________

لما ماما ماتت السنه ال قبل ال فاتت ف يناير، جوز ماما بعد يومين لم كل الحاجات ال تخصها وال كانت اغلبها هدوم ،هدوم كتير بس كانت مكمكه حبه بسيطه لانها مكنتش بتلبسهم لمرضها الطويل ،
جاب شنطه ضخمه ولم فيها كل هدومها، وهو بيلمها قالى انه هيعدى على كل بيت من بيوت قرايب ماما ويسيب حاجه من هدموها عند كل ست
لمه للهدوم كان سريع جدا بس كان بيتوقف كتير عند تايير حلو مزهزه او مطرز ويفرده ويبصه لفترة ثوانى ، ثوانى من ال تمر اد لبس ماما للتاييير نفسه حوالى نص ساعه او اكتر شويه لو كانت رايقه،
طول ماكان بيلم الهدوم كنت بحاول اوصل له بطاقه جسديه بفركى فى المكان انى محتاج حاجة من الحاجات ال تخص ماما بس كنت مخضوض اكتر من فكرة لم الهدوم نفسها،
عجزت تماما عن الاحتفاظ باى من الحاجات ال ممكن تتاخد من هدومها، فى النهايه روحت اوضتى ودى كانت غالبا اخر مرة ليا فيها لانى سبت البيت بعدها على طول وبدون رجعه، لاقيت تحت السرير وانا بطلع جزمتى القديمه المتقطعه وال هتنفع برضه وانا بسيب البيت ومش راجع ،لاقيت ايشرب كاكاوى عليه صبغه كنت بربط شعر ماما بيه لما كنت بصبغ شعرها وهى مريضه جدا ومش واعيه بحاجه عشان تقدر تسند على المخده، غالبا هوة وقع منها تحت السرير بتاعى من اخر مرة قبل موتها بيجى شهر، شهر مش بصحته شهر مريض ومعجز وحركته بيحس بيها ان معدته بتوجعه وان حركه كمان وهيقع، شهر طويل يجى فصل خريفى من ال بيحكوا عنه ف الشعر القديم،
كنت لازم اقرر انى هاخد الايشرب ولا لأ، فى الحركه ال الزمن ال كان بيطلع فيها جوز ماما من اوضتها فى اتجاه اوضتى للم بقية الحاجات التابعه لماما فى الشنطه الكبيرة ،وهو بيتحرك كان بيكلمنى وبيسألنى انى اسعده انى الم السبح والسجاجيد ال بيستخدمها، الزمن ال اخده لمروره من اوضتها ال هى اوضته الى اوضتى ال هى اوضتها، كنت قررت انى اسرق الايشرب ال مليان اثر من الصبغه تحت المرتبه،
وقعدت عليها
سألنى مالك
وكنت برد فى سري (لأ مش هقدر احافظ على الايشرب واحتفظ بيه طول العمر)
انا نسيته
الايشرب

________

اول بيت سكنت فيه بعد ما ماما توفت، كان بيت فى الدور ال تحت الارضي، وكان مفتوح على منور مواسيره بايظه وبكده كانت ريحة الشقه مجارى،
عشان الهى نفسي ركبت وصلة دش والولد ال كان صغير اوى وهو بيركبه سالنى انت دفعت كام يا استاذ
انادفعت 150 ف الشهر
زعل اوى وقال لى الست فاطمه الله يرحمها قبلك كانت مبتدفعش اصلا غير 90 جنيه الله يرحمها، هى ماتت من اسبوعين على الكرسي ال هنا ده
هى ماتت هنا
اه كانت ست غلبانه كانت بتشحت عشان تتدفع ايجار البيت
استخدام الحمام بعد كده بحجمه الضيق، بحيث انت لو قاعد على قاعده الحمام هتبقى محاوط بيحطان وحوض وخرطوم للدش
لامسينك
وقت طويل ال قضيته وانا قاعد على قاعده الحمام انى اقرر اشيل الخرقات المبلوله ومرميه على الارضيه فى الحمام، من متعلقات الست الشحاته ال كانت ساكنه قبلى،
كانت الخرقات لونها احمر نبيتى مفترض انهاكانت من متعلقاتها القديمه قبل ماتموت بفتره وال لسه محدش لمهم ليها فى شنطه كبيرة
وقت طويل اد عصر وهضم الاكل الغير المتناسق فى مكوناته الغذائية جوه معدتى ، يجى تلت ساعه، بزمن يتحسب بمعدل دفع الميه من الشطاف،
انى اشيل الخرقات من على الارض وارميها فى الزباله،
وقت اطول فى البحث عن كيس البسه فى ايدى عشان ملمسش الخرقات وانا بشيلها
ولمستها بدون قصد
________

فى البيت التانى بعد كده ال سكنته كان اجمل، باستثناء وجود شبابيك هشه منفده على الشارع وسهل الدخول منها،
وان صاحب الشقه مكنش صاحبها، وان مراته طلبت منى تانى يوم انى اسيبها لانها شقتها،
بس مرة كنت راجع بالليل وكنت عايز اعمل شوربة فراخ بالبصل
متنفعش غير بالبصل
كان لازم تتعمل ببصل مش كل مرة بقى
الست ال ساكنه جانبي كانت معلقه روزمة بصل كبيرة وانا كنت مفلس تماما، جبت نص فرخه بالعافيه عشان اعملها شوربه،
انا ابتديت من ناحيتى وحطيت النص فرخه فى الحله على البوتجاز المستلف بشكل مؤفت من محمد،
وانتظرت قدوم البصلايا
مجرد بصلايا صغيرة من روزمة البصل ال متعلقه فى المسافه غير الرهيبه بين باب شقتى وباب بيت جارتى
طلعت بره ووقفت ادام باب شقتها، متهيب لخروجها فى اى وقت لان حركة كتيره كانت بتم ادام باب بيتها من جوه
الزمن
الزمن ال اخده ف التفكير انها لو شفتنى وانا باخد بصلايا باستعرها من عندها
زمن يتقاس بطهو ورك وكتف فرخه ضئيله على نار بوتجاز محمد ال مستعيره بشكل غالبا هيكون نهائى
بصلايا صغيره تليق بانها تضع نكهه على النص فرخه

الوقوف ادام الباب
وانتظار شد بصلايا