Tuesday, August 28, 2007

برواز فيه لمبه


فكرة الكنبه الحمرا نفسها قايمه على تسليتى لما اكبروابقى عجوز تماما

انى اقعد اتسلى فى قرايتى

سميها برانويا او هبل شيطانى محكم

الاسبوع ده مش من الاسابيع المثيره فى حياتى

برغم مرور حاجات فى منتهى اللاعاديه ليا

بس التعود

التجاهل

نجحت اخيرا فى الانفصال عن بهظ بين حجرتين

واصبحت ليا حجرة بمارس فيها العاده المتعبه جدا وهى النوم عاريا

وال كانت بترهق الواد بهظ اذا ما البطانيه الحمرا اتسحبت من عليا واذا كان جى ينام جنبي عشان ننم نمات ليليه قبل النوم

كل ده عادى

اقل م العادى

انطونيو كمان سافر بلا رجعه وفقد المكان على رغم عدم قوة العلاقه اوى فقدت روح اندلسيه

بس اتبقت اكتر فكرة الافتقاد نفسها وال فكرتنى بماما بالبيت القديم اخويا زمان

لا والاكثر عاديه

ان روح اسكتلنديه ساكنه معانا اسمها بوب ومحتل حجرة الكنبه الحمرا ال نورها اتحرق فمبقتش اشوفها او انام عليها

واصبح العادى ان انطونيو الاسبانى بكل ريحته وثقافته وعصبيته بيحل مكانه اسكتلندى بكل شعره وجزمته الكومبو

ومن باب التجاهل ال بيحل بيا الايامى دى ممكن اختلس خروجى عارى من باب اوضتى الجديده ال ببلكونه الى الحمام الصبح عشان استحمى

ومحسش بحرج لانى متاكد من عدم وجود بهظ صباحا ونوم بوب المستمر

للدرجه ال ممكن اكوى فيها عند باب الشقه حيث الفيشه الوحيده السليمه وخلفى شبابيك المنور المغلقه صباحا اوى وانا عارى

انا ايه

ايه كميه التجاهل والاعتياديه دى ال انا فيها

اول الاسبوع ده زار رئيس الوزراء المول ال بشتغل فيه عشان كان بيشترى تحف

عملت الفاتورة للسيد رئيس الوزراء وال كلفنى فى المقابل مراجعه بطاقتى وتاريخى غالبا الشخصي قبل مروره بفتره

حيث اسماءمعينه كان بس المسموح ليها انها تتواجد من موظفين المول فى يوم حضوره

ايه تانى عادى جدا حصل

ان شوفت رئيس الوزرا لاول مرة كاجول بشبش وتى شيرت تركواز وطوال فتره مروره قدامى افتكرت دولة النحاس باشا بدون ربط

اهو ربط تاريخى وبس

عم سعد البواب بهظ دافع له 10 جنيه عشان يشيل كياس الزباله من ادام باب الشقه

وعم سعد كان قرفان شويه منى من اعتراضي على الفكرة

لا ورفض اخدها فى الاول لولا الالحاح

يتصدر عم سعد غالبا غلاف كتاب انطونيو ال هينتجه واحد يابانى عن رحله اسبانى فى اسكندريه وال هيتباع غالبا بشكل دولى وباللغه الانجليزيه

واحد صاحبي قررالانفصال عن اهله واعلان استقلاله التام ومشاركتى الغرفه

كان رد فعلهم عادى جدا

راحوا يصيفوه بره اسكندريه

وهو جمد فكرة استقلاله لفتره موجزه وراح عند خالته


اوضتى الجديده ال بتطل ع البلكونه

لمبه قلاوظ فى براوز خشب من مخلفات فيلم رامز يوسف وادامها جيلاتين ازرق واصفر معكوس نوره ع الحيطه

المكتب او الديسك من مخلفات انطونيو عباره عن باب المطبخ مفرود بالعرض على حاملين خشب فوقهم معلق على الحيطه بمسامير ازازه كونيالك لقتها فى المطبخ تحتها متعلق كوبايه بنى من مخلفات ماماوبرطمان صغير جواه صورتها وتمثال ركيك لبالرينا من مخلفات فيلمى ال صورته السنادى بعدها على نفس الحيط فيه شكوش متعلق جنبه علبه مونيكر وسبحه ولوحه سودا وكتاب متثبت فى الحيط بحبل

كتاب عن شعر الهايكو

مفتوح على قصيده


صعب ان اقطفها

صعب ان اتركها

اه

تلك البنفسجه الرائعه

10 comments:

fawest said...

بتفكرنى بكتابات صمويل بكيت
بيجمع كلام جمب بعض و فى الخر أة فى خلال قلااءتك
تجد نفسك فجاة مع الكاتب والبطل و الحالة اللى عاوز يقولها لك
سلملى على بهذ و بوب

ساتابع مدونتك
باين الكنبة الحمرا اللى سيبها ممتك
هتأثر فينا كلنا

حــكــيــم روحــانــى said...

التجاهل
النوم عاريا
كياس الزباله
تمثال ركيك


مـخـلـفات

دودو said...

بناخد وقت طويل جدا علشان نفهم حد معين
مع ان الحكاية مش محتاجة غير دقايق نفهم فيها نفسنا

بسيطة خالص صح؟

بس مين يقدر على ده!!!!!!!

غييييييرك

moneer said...

بلال فترة كبيرة متكلمناش شغلك مشغول
بس تدويناتك بتسببلى ازمة نفسية

مش قادر اتخطاها حاليا
بتعلم منها انى ضعيف
جدا
سطحى
طعمها مُر زى السقارة 10% بس بحب تاثيرها اللى بيعملى ازمة نفسية
و اهو الشتا جاى و الازمات هتتجمد
سلام

الكنبة الحمرا said...

فوست

حلو انك عارف الخيط ال بيتكر باركته للوصول لاخر الكلام
بس انابأكدلك انا هنا بكتب مذاكرات شخصيه
متاثر فيها بطريقتى كا كاتب
منور الكنبه
انابعت روحى يا
فاوست!!!!

الكنبة الحمرا said...

حكيم روحانى
هنا محل المخلفات
لو عندك حاجه اعرضها
الاسعار زهيده

الكنبة الحمرا said...

دودو
انابجد فعلا مش عارف ليه بتاخد وقت طويل فى فهم حاجه بسيطه فى علاقتنا بحد
وكمان بنعيش وهم ان العلاقات معقده ومش واضحه

ومتشكر انك لامسه حكايه البساطه عندى
صباح الفل

الكنبة الحمرا said...

منير
كيفك
الازمات النفسيه شيء سيء تخطاه احسنلك
خصوصا على رأيك الشتا داخل

ومتشكر ارتباطك بالكنبه
مسيري اورهالك مره فى الحقيقه وتعرف انها مش حلوة اوى كده فى الحقيقه لما بينام عليها الواد بوب الاسكتلندى
بجزمته
!!!
وانا متجاهل الفكرة

vetrinary said...

هوا انا فعلا نعلقتش

مش فاكر

اوعى اكون علقت وانتا معجبش التعليق مسحته؟

ازيك يا معلم

الدنيا عامله فيك ايه

انا قريت البوست ده من زمان

انتا بطلت تكتب زى
اكيد مبضووون

انا كده بردو

مش هنغير بقى

انا بحاول

ادعيلى

نفسى فى عيل
اربيه كويس

عشان لما اكبر محتجش لكنبتك الحمرا

الكنبة الحمرا said...

vetrinary

صباح الفل
مرورك ع الكنبه بيشبرها يا جميل
بيشبرها يعنى بيعملها شبر شبر
وليست كما متعارف عليه بيعمل شبوره

ويا عم الكنبه دى بنتك
صيعها زى ماانت عايز
متدعيش لنفسك بالخلف الصالح


منور