Thursday, January 17, 2008

الحيط


ع الحيط برواز

متعلق فيه صورة امى وادمها ازاز

يتعفر آجي ماسحه بكمى ماهى اغلى عزاز


ماانكرش ان الصورة ازازها مكسور م الحرف

من ساعة قلبي مايوم عازها ومنطقش بحرف

من يومها اتخنقت امى

والصورة فيها حبل الشنق


ع الحيط فيه شق

بيبان فيه الطوب الاحمر من عرى البوية

بيبان فيه الكنز الفاضي بتاع ابويه

بيبان فيه الشرخ ال اتمد لجوايا


ع الحيط آيه

آ ية الكرسي

ال اختى بتبوس فيها لو يوم هـتأخر من نفسي

لو يوم هتنزجر من نفسي


ع الحيط فيه كوبس النور

من ضغطة

يرمى الفاس ع الاوضة البور

وانام ع الكنبة

الكنبة ال الجنب بتاعها

مزنوق ع الحيط

5 comments:

fawest said...

هى مقطوعه شعريه جميله
بس
ليه مش عارف أفصلها عنك
دلوقت أسأل نفسى
هو لازم أفصل إيه الغباء دة
برجع أفكر تانى
لو مكنتش عرفت علاقتك بأمك و الكنبه
هل كان جرعه الدهشه و العجاب
هتزيد
آيه الكلام الخرفان اللى بقوله دة
طب معنها مذاد أو نقص
المهم أنها بتعبر عنك
وأستغل معرفتى بعلاقتك بأمك و الكنبه
و اؤكد أنها تعبر عنك و عن حالتك
وكفى

الكنبة الحمرا said...

فاوست
اشكرك لاستبعاد مناطق الافتعال عن المقطوعه
لانها لم تكن موجوده من الاصل
والغريب ان القصيده مكتوبه قبل وفاة ماما ب 7 سنين
ان كان ده غريب فعلا


صباح الفل

fawest said...

حقيقى ده غريب
يعنى كده

أنت بتفكر بنفس مفرداتك
والحاله متغيره

تصدق أن ده غريب فعلا
ألم تلاحظ هذا فعلا

Anonymous said...

مش غريب هو فكر لماماته لو ماتت هيحصل ايه

الكنبة الحمرا said...

غريب يمكن
او حدسي بعض الشيء
صباح الفل