Wednesday, January 23, 2008

الناس

الناس زعلانه من الحياه معصوبة من الجمال
وحجتها الوحيده انها شايله هموم العيال
شايله هموم الجبال
شوف تقل دمهم
شوف عنف سجدهم
بيحسوا بذنب فاضح
الناس
متحسش فرق واضح
بين وشوشهم والتراب
زعلانه من الحياة معصوبة من الجمال
بتعبد فى الحقيقه بتقوى على الخيال
الناس
حساسه فى فقرها
بترد عليك كأنك
هتشدها من شعرها
وتجرجرها السلالم عشان سيدها الغنى
والغنى
غرقان بهت وفجاجة
خايف من كل حاجه
عامل زى ال ضيع عمره يحوش مهرها
الناس
زعلانه من الحياة معصوبه من الجمال
وحجتها الوحيده انها شايله هموم العيال
شايله هموم الجبال

3 comments:

عـسـل مـرمـر said...

خصوبة الخيال ,, هيه اللى بتجيب العيال

عـسـل مـرمـر said...

على فكره الكلام اللى ف البروفايل بخصوص مامتك و الكنبه ده كلام مؤثر جدا

بس ابقا صلح الأخطاء الاملائيه اللى فيه يا معلم

الكنبة الحمرا said...

الخصوبه فى الرطوبه وكله تمام
اما بخصوص الكلام ال ف بروفايلى فلا يوجد به غير خطا املائى واحد الهمزة على فجاه

وطبعا الافتعال كما اشرتى عندك