التقسيم المتعارف عليه رسميا فى بيت بهظ وبيبو وانطونيو

اصبح لدينا شريك تالت فى البيت بشكل نهائي

السيد انطونيو فروم اسبانيلولى

وده لانه قرر الاستقرار فى مصر

بيقول انه فى سفريته الاخيرة لانجلترا موطنه التانى انها لاقاها بارده

وانه حاسس بالدفا هنا ف مصر

وان علاقته بيا وبهظ وصحابه وحتى عم سعد البواب حاجه حلوة ف حياته

دلوقتى بقى البيت 3 اوض

اوضة المرتبه الزرقا ودى اوضة انطونيو وال دايما نضيفه ومرتبه ومسار مزار سياحى من صحابي لما بيجوا ويلاقوا الباب موارب ويتمصمصوا

يعنى اسلام عياد مثلا وهو واد شغال ع الجرافيك وبيعمل فيلمه الاول القصير

اول ماشفها قعد يتكلم على الالوان لون المرتبه الازرق والفوتيه الاحمر ودرفة الباب البيضا المقلوبه ترابيزة

والتناسق بينهم بينما نظر لباقى البيت على انه مش متناسق خالص وهمجى واهبل

الاوضه التانيه هى اوضتى انا وبهظ وال بنام فيها على مرتبتين اوارنج بخط طولى وفضا ف الاوضه ودولابين خشب عملناهم ومثبتينهم على ضهر الحيطه

وشربات كتيرة

(بهظ اصبح عنده شنطه شربات

الاوضه التالته ليفنج روم كبير واهبل كده فى نفسه وفيه مقر الكنبه الحمرا والفوتيهات الباقيه وجهاز كمبيوتر نص شغال وتليفزيون تحول بعد ان اتحرق الى ترابيزة تحت الكمبيوتر مؤقتا لحين تصليحه

ومكتبه للكتب بتاعتى او الكتب ال انا فاكر انها بتاعتى لكنها مقسمه الى اقسام مختلفه

قسم مستعار بصفه شبه دائمه من عمرو عافيه على محمد رشاد على مجهولين وال اغلبها عن الادب اليابانى وشعر الهايكو وديوان كفافيس الوحيد او الروايات الروسيه وروايات نجيب محفوظ

وقسم مهداه من مؤلفين زى اعمال عمرو عافيه نفسه او علاء خالد او احمد حداد بطل الفيلم بتاعى او اى من الكتاب ال بعرفهم بشكل شخصي

وقسم اخر لكتب ميكى ورجل المستحيل واصدارت القنصليه البريطانيه او كتب عن التنميه ودى المضمومه من بهظ

وبتنتهى الاوضه بشباك بيطل على حيطه لان مبنى ادام الشباك عماره وواقفه بضهرها

البيت رغم برودته وارضيته الفاضيه

الا انه تشكيله فاخرة من

حضارات وبيئات

اؤكد بيئات مختلفه متباينه

يعنى انا مرة صحيت لاقيت انطونيو بيرطن بالانجليزى ابو لكنه اسبانى وعم سعد بعيد ماشي بيتجلو فى البيت بين الاوض

ببراءه منى وسذاجه محببه وعته منغولى اصيل ومـاصل فى عروقى

روحت سحبته من ايده لحد باب الشقه وطردته وقفلت الباب وهو ابتسم ابتسامته الصعيديه ال بتبرز كل حشو سنانه وبلعومه