ترددات سقف جيري

ف الاوضه ال بنام فيها , فيه ف السقف لمبتين واحده بس فيهم ال منورة, فيه واحده ست مؤكد ساكنه فوق , لان فيه خطوات بتبان مسموعه اوى انها بتتمختر ,خطوات بتحسها مرتكزه خطوه على رجل والتانيه اخف منها , سمى التمختر دى ال بيسبب افتتان حد بمشية الستات ال فيها اهتزاز رائع للارداف, الست ال فوق عند خطوة معينه منها على الارض_ ال عندى بتبقي سقف_ بتنور اللمبه ال مهزوزه , واللمبه مش بتتفتح تانى بعد مااقفلها , بس اى حركة كعب فوقها بيخليها تنور تانى,ايا كان الامر انا مسدأ ف فكرة ان ال بينور سقفى كعب ست , هتتك بكعبها على السقف اللمبه تنور

--------

اول امبارح يبقى فات سنه على رحيل ماما, ولانى شخص مفتعل بطبعى اقعدت مش قادر انام وقت الفجر وده الوقت ال ماما ماتت فيه,ف الاخر نمت وصحيت بدرى عشان ازورها , دى كانت اول مرة ازورها بعد موتها ,قال يعنى كنت رافض فكرة انى اشوف اسمها على يافطة رخام بارده _وتعبير يافطه رخام بارده مفتعل فى حد ذاته _

وقفت عند قبرها وكان عالى وله باب مقبضه حديد وكنت متخيل لوقت طويل وقفتىادمها انى ال بينى وبينها مقبض حديد هشده, اخويا كانت بيدور وسط القبور , وبعد كتير رجع بعلبة صفيح متنيه وراح ماليها مية وسقا بيها الزرع حوالين قبرها , هوه مخدتش باله ان الصفيحه كان فيها بقايا جير ابيض, وهو بيسقى الزرع كان بيسقيه جير

انا منبهتوش وسبيته, هوه كمان عينيه كانت سرحانه بعيد ومش شايف بيسقى ايه

-----

فيه بنت ف الدور الخمستاشر لما الاسانسير بيعطل مامتها بتخليها تنادى على عم سعد البواب عشان يطلع يجبلهم الطلبات,بيتهيالى عم سعد بقبحته ممكن يزداد وسامه من ترددات صوت البنت وهى بتنادى عليه ,صوتها متدلع وف كل مرة بتنادى عليه ف نطقها لاسمه كانها بتلعب بحاجه او حد بيزغزغها , عم سعد مش بيحلو انا بسمع صوتها بالعافيه وانا بفتح الباب ف الدور السابع , هوه بيبقى ف الارضى واوقات كتير قافل عليه اوضته

مش هيحلو

--------