قصيده الكنبه

انا نسيت امبارح اشترى كنكه
واضطريت اسخن ميه عشان الشاى ف الحله
وبالصدفه البحته الحرارة اتقطعت
لان فاتورة التليفون الى فاتت لأ الى قبلها ما ادفعتشي
انا حتى كمان بطلت البس اندر وير
علشان لما انام وياها ماتشوفش القطعه
بس كفايه كده
انا هاخد الكنبه الحمرا بتاعة امى 000 الى وارثها
وهاروح اقعد ع البحر
هاروح اقعد على طول
وهاشترى بالطو كبييير مجرب 00 جاهز
ما انا كده كده بكرة اكييد
مش هلاقى حاجه تليق البسها
---
كنبه حمرا ع البحر
وضع برضه
---
انا هاشحت بس سجاير فرط
وشعرى هينبت ابيض سلك
وهاكتب شعر
واسرح ف حاجات انا عمرى ما كنت اتخيل انى حاسسها
وف مرة
ها لتفت ورقبتى بتوجعنى
وهاشوف واحده ست ف بلكونه ف كليوباترا
عجوزه عضمها ناشف
واقفه بتنشر كل كلوتتها على اول حبل
وهاتضحك
وتبان كل سنانها الواقعه
وهاموت
بعد ماهنقل الكنبه للازريطه
هاموت
وكل طيور البحر هناك
هتخرم راسي
هتاكل راسي بمنقرها
ع الكنبه الحمرا