Tuesday, January 16, 2007

الطفايات

ضيف علينا واد لذيذ اسمه ( هندس)هو غنى شويتين وده محبط , كل يوم بيحب ياكل مكرون يا رز فرن طاجن محطوط ف فخار, بيتنا(الله حلوة اوى كلمة بيتنا )بقى مليان فخاخير ( جمع فخار )كتير بنيه اللون متوسطة الحجم
ولاننا ولاد ناس اوى انا والسيد (بهظ) وبالتالى نطحنا على السيد هندس ف مش بنرمى حاجه
واصبحت الاوضه مليانه على الارض ف كل حته علب فخاخير حلوة
فكرنا نعملها طفايات نحط فيها رمل ونطفى فيها كمان, انا فكرت باعتباري نايم جنبا الى جنبا معها اننا نعملها قواقع شموع فى الاركان
ولانى فاضي معاها بالليل ( الفخاخير ) قلت وانا يائس اننا ممكن نعمل فيها شاى لاننا لا
لا ولا يعنى
لا نملك براد
هندس قالى انه ممكن يفرقع لو اتحط على الفرن الكهربا ال لسه متفتحش
وبشكل شديد اليأس حلمت انى ماسك الفخار ورفعه فوق عين البوتجاز بسخن شاى

التفاصيل امر رهيب وممكن تكتشف ان موتك بيبتدى لما تتخلى عن تفصيله تفصيله منك
الواد هندس صحيت مرة بالليل اوى كانت الدنيا بتمطر لاقيته واقف عند الشباك وماسك شمسيه وبيتفرج على المطر

وبهظ جه مره فرحان اوى من عند اشرف, لقى كل كراكيبه القديمه وقرر انه لما يفرش اوضته يعلق كل الحاجات دى على الحيطه ادام المرتبه ,كانت الحاجات دى اول بوست كتبه ,ورق صغير فيه كلام عنه,فردة شراب من وهوه طفل , بهظ قعد سرحان منتشي جدا بيبص ف السقف وهو بيعد الحاجات ال لقاها,كأن بنت حلوة مرسومه بضهرها علي السقف
كان مع تفاصيله
ماما برضه كانت متجوزه واحد متدين اوى وهى كانت ست رايقه بتحب الحاجات العيب الصغننه
ست بجد
بس هى كانت طيبه ,جوزها خلاها تسدأ ان التماثيل الكتير الصغننه اوى دى وال هى بتحبها اوى, هتمنع الملايكه تيجى البيت ,لانها لاتدخل بيت فيه تماثيل
ماما صعب عليها اوى ترميهم وقررت تخصص رف من دولابها البنى الكبير, خصصته بس لكل تماثيلها الصغيره ال على شكل بالرينا وقفلت الدولاب عليهم عشان الملايكه تيجى براحتهم
وفضلت كل ما تفتح دولابها ترمى نظرةعليهم حتى لو لحظيه اوى

تفاصيلها


5 comments:

Anonymous said...

غنى آيه بس قول يا باسط، كل اللى معايا 2.75 قرش . بس تعرف بجد الشقة بقت جزء لا يتجزأ من احساسى بإسكندرية على انها مكان دافئ جميل فيه حياة مش موجودة فى اى مكان تانى بالشكل ده.
وعليا الطلبات بالطاجن لو ماجتش القاهرة وقعدت معايا يومين لأكون مسيحلك على اللى بتقوله وانت نايم

Bahz.Baih said...

بص يا عم بيبو أنت كده بتخبط فى الحلل و التفاصيل الشخصيه و بص بقى مالكش دعوه بشرباتى و الا هعزل و أسيبلك الأوضه و أروح الأوضه اللى بتبص على المنور

Anonymous said...

قال يعني يا بهظ الاوضة اللي انت عاوز تسيبها بتبص ع البحر و ما نتوا كل اوضكم بتبص ع المنور
ما انا كنت حاضر و عارف كل حاجة
مودي

Anonymous said...

احلا ما فى تفاصيلك المطر والشمسية والى ماسكها
بس فيه اكيد حاجات حلوة كتير
معلش بأى العتب على هندس :)

بلال حســــنى said...

هاى
اكيدهندس حلو
مين بيقول كده
!!!!

---------
متشكر
لاهتمامك